Tuesday, February 27, 2007

مصر بين المطرقة والسندان

على طريقة أفلام وحيد حامد يظن الكثير ان الإخوان هم هؤلاء ذوي الذقون الطويلة والجلاليب القصيرة ...وفي ذلك عاملين كبيرين وهما الإعلام والناس أفسهم وجهلهم .......لا يوجد مصري واحد على ماأعتقد لايعرف الإخوان وربما إحتك بهم ...........كانت معرفتي الأولى بهم وادراكي لهم عندما وصلت الى اسماعي انهم( الحكومة )قبضوا على أقارب لي وباتوا كام ليلة كده وطلعوا ...وكان منهم من هرب من فوق السطوح .......الصراحة عندما سمعت عن ذلك وكيف أقتحموا البيوت كان احدهم ابن عمتي وكيف انهم وجدوا الشارع مدجج بسيارات مدرعة ورجال بوليس وكيف فتشوا المنازل قطعة قطعة ..............كان الموضوع اشبه بأنهم يحكوا عن بلد اخرى او فلم من افلام الرعب ..........وكانت التهمة بالتأكيد الإنتماء لجماعة محظورة ...وكانت معرفتي الأخرى بهم بجيل النصر وبالتأكيد لا يوجد طالب في جامعات مصر لا يعرف جيل النصر ..........تلك هي بداية معرفتي بهم..

واحد صاحبي :ياعم روح دا كلهم متشددين وبدقون
أنا : انت تقصد انصار السنة
واحد صاحبي:لا أقصد الإخوان
أنا : طب جبلي واحد من جيل النصر اللي عندنا في الكلية عنده دقن
ذلك حوار أفاجئ فيه بأن الموضوع عند صحابي مهلبية خالص فلا فرق عندهم بين انصار سنة وإخوان و الجمعية الشرعية وللأسف لا يعلمون أنهم يكرهون بعضهم بعضا
فأنصار السنة يقدسون الشيوخ السعوديون السلفيون أمثال الشيخ الجليل ابن باز وآل الشيخ وغيرهم بالإضافة الى الشيخ الألباني والحويني بل يعتبرون الشيخ الحويني بعد الأئمة الأربعة و الشيخ الألباني معلم الحويني الجليل
وطبعا يرفضون السياسة رفضا تاما ويرفضون الخروج عن الحاكم ويرفضون المظاهرات ويرفضون كل شئ
طبعا انا عرفت الكلام ده منين ...أقولكم ان إحتكاكي بهم اثناء جلسات العلم المعروفين بها في مساجدهم .....طبعا طرق انصار السنة والإخوان واحدة داخل المساجد وان كان الإخوان على نطاق أوسع..........ولكن يكفيك فقط ان تدخل أحدى المساجد.....................والسيناريو كالأتي
قاعد ساند على العامود وسرحان في السقف بعد صلاة العصر................تفاجئ بأحد الأشخاص جاي وبسمة على وشه ..السلام عليكم يا أخي
وعليكم السلام
أخوك فلان الفلاني
أهلا وسهلا
وبعد التعرف
عندنا ان شاء الله وقفة بعد صلاة الجمعة لنصرة اخوانا في فلسطين امام المسجد الفلاني
اسرح شوية
هه ان شاء الله هاتيجي هانتجمع كلنا الساعة11 وهانركب ميكروباص
طبعا أوافق ..أي حاجه ضد الحكومة قشطة جدا ..نروح
أقول لهم في البيت كالعادة بابا يقولي بحماس روح يابني وماما تقولي بخوف بلاش مش عايزين مشاكل ...أقول لها هو انا رايح افغانستان ...أفاجئ في الساعة11 في يوم الجمعة ان كل الميكروباص عيال صغيرة و بعضهم شباب كبار.......... وهناك بعض الركاب الذين يركبون بالصدفة في الطريق والركاب دول من الشعب العادي جدا
ويفاجؤا وأفاجئ معهم بأحد الشباب الأخوان يقول :بسم الله الرحمن الرحيم ..دعاء الركوب ويردد الباقي وراءه ...طبعا وانا فطسان من الضحك ...مش مدرك دهشة الركاب العاديين من اللي بيحصل في المكروباص ..........طبعا دي مشكلة الناس العاديين المسلمين اللي مش حافظين دعاء الركوب
............................
التكملة انشاء الله البوست الجاي

9 comments:

اروي الطويل said...

ههههههه
فعلا للاسف عدد كبير جدا ما يعرفوش الفرق

محمود سعيد said...

بسبب تعدد وإختلاف وسائل الإعلام فى بلدنا مصر

كل واحد له 60 رأى عن الإخوان

تسأله جيبت الرأى ده منين يقولك معرفش

احنا كمصريين
بنكون رأى عن أى حاجة بسرعة كبيرة
وبنغيره بصعوبة شديدة
وإحياناً بكل سهولة

مستنى الحلقة التانية بتاعتك

koukawy said...

علي رأيك الأفلام مشوشه 00
انا علي حد علمي ان اللي الأفلام بتجبهم دول و اللي هما اساس في افلام وحيد حامد دول السلفيين المتشددين اللي هما كمان بقوا ظاهره في معرض الكتاب 00
و الاخوان 00 برضو علي حد علمي هما اتجاه سياسي اكتر منه ديني
و مش كلهم بدقون انا اعرف ناس من مناصرين الاخوان و مش بدقون

الوردة السوداء said...

هايل جدا
كويس انى لقيت حد اتشجع وفتح السيرة
بجد انا اتكلمت كتير فى الموضوع ده مع ناس كتير

الفرق بين انصار السنة والاخوان

الاتنين كويسين جدا
لكن ياجماعة الاخوان حاجة تانية خالص
وبجد انا عرفت ناس كتير اخون عظماء
وبجد ملقتش زيهم

تحياتى الجامدة جداااا
ليك

ma 3lina said...

استاذنا الفاضل ..
تعيب على أصحابك إنهم مهلبية خالص ومش عارفين الفرق ؟؟
وبعد كده ذكرت كلام عن جماعات يتضح منه إنك لم تحتك بهم جيداً ولم تعرف عن أي جماعة منهم إلا القليل .. مسألة كره بعضهم ومسألة تقديس العلماء ومسألة التشدد
فاسمح لي أقول رأيي
أولاً وجود الجماعات أمر طبيعي جداً .. وليس فيه خطأ أو تقسيم للإسلام .. لأنها رايات جميعها تحت الإسلام ..

النبي صلى الله عيه وسلم قسم المسلمين في غزوة أحد إلى كتائب واحدة للمهاجرين ولها لواء وأخرى للأوس ولها لواء آخر وكتيبة للخزرج ولها لواء ثالث

ودا لأن دواعي المعركة تتطلب تنويع وتوزيع الجهود
والإسلام الآن في معركة ودا يستدعي تنوع الجهود ما دام مفيش تضارب مع قيم الإسلام ومبادئه

ثانياً .. حكاية بيكرهوا بعض دي محتاجة إعادة نظر ..فالاختلاف والتنوع لا يعني الكراهية .. وما يفعله أفراد منتمين لاتجاه أو فكر معين لا ينطبق على جميع الجماعة .. ولو وجدت جماعة تكره الأخرين فالأخرين لا يبادلونها الكراهية
ثالثا .. الجمعية الشرعية .. جمعية مشهرة تتبع لوزارة التأمينات والشئون الاجتماعية وتهتم بالخدمات الاجتماعية والإسلامية عموماً
والسلفيين .. هي ليست جماعة وإنما دعوة عامة يهتموا بالعلوم الشرعية كحل يخرج الناس من جهلهم بالدين كما ذكرت في موضوع دعاء الركوب
الإخوان يهتمون بجانب السياسة
كل جماعة لها أهداف تصب في النهاية في مصلحة الإسلام

وجميع الجماعات لا تعترف بولاية الظالمين .. إلا فئة واحدة منهم أظنها هي من قابلت وهم ينتمون للمنهج السلفي ولكنهم لا يعبرون عن المنهج السلفي ككل ..
والمنهج السلفي لا يعترف بتقديس العلماء كما ذكرت لأن فكرتهم في تحصيل العلم تتلخص في نبذ التعصب للمذاهب الفقهية القديمة كما أنهم ينبذون تصنيف العلماء حسب بلادهم فهذا سعودي وهذا مصري فيأخذون من أي عالم مهما كانت أرضه ولا يأخذون من علماء السعودسة لمجرد إنهم سعوديين

لا انتمي لأي من الجماعات المذكرة ولا غيرها .. ولكني احتكيت بجماعات كثيرة ورأيت أفكار أفرادها ورأيت من ينتقد الجماعات الأخرى وأشهد أنهم قلة في عالم الجماعات


ولو تتابع الأخبار تجد أن في موضوع الإخوان الأخير هناك سلفيين تم القبض عليهم بتهمة مساعدة الإخوان
شوف الرابط ده

كما أني أعرف كثير من الجماعات المختلفة والأزهريين يقفون مع الإخوان في محنتهم

فمن أين جئت بموضوع كره الجماعات لبعضها .. وإزاي عكست آراء البعض على الجميع

للأسف أظن أن الصورة عندك كما عند أصحابك غير كاملة .. وتحتاج لبعض المعلومات من مصادر أخرى .. في دوائر أوسع من دائرتك

وعلى فكرة الدفاع عن الإخوان لا يكون بالتبرؤ من جميع الاتجاهات ..

وأخيرا .. اختصار التشدد في اللحية .. فكل من أطلق لحية ولبس جلباب فهو متشدد .. هو ذاته نوع من التشدد .. واللحية منصوص عليها شرعاً بنص أحاديث صحيحة .. فهل اتباع سنة النبي تشدد .. وحلق اللحية مرونة ؟؟ موضوع آخر يحتاج إعادة النظر متي يستحق الرجل وصف متشدد

يااااااااااه .. أنا طولت عليك قوي .. معلش اعذرني .. ممكن نفتح حوار ع الإيميل بتاعي .. وقبل ما تكتب بوسك إيه رأيك تعال نتكلم ونناقش النقط ونشوف حقيقة اللي بيحصل .. عشان ما ننقلش صورة جزئية للواقع وعشان في الآخر نطلع أنا وأنت بصورة واضحة .. إيه رأيك

إنسان || Human said...

مع علينا
..................
أنا مبسوط جدا على ردك ..وكنت اتمنى أي حد يقول رأيه بالطريقة الجميلة دي وانا بجد يسرني نقدك البناء
ثانيا......أنا قرأت الكلام اللي انا كتبته تاني...عندك في عدم الإحتكاك المباشر مع الجماعات ولكني أيضا أستشفيت بعض الأشياء من احتكاكي المباشر بهم ......وربما اني أحتكيت بأشخاص لهم اراءهم المتشددة ولكنهم يحسبون على السلفيون
................
اما عن انصار السنة ..السلفيون
فولاءهم لشيوخ السعودية ...وفتاوي الشيخ بن باز توزع في مساجدهم ..ويشككون في نزاهة المشايخ الأخرون وهذا معروف ومعروف ايضا علاقتهم بالقرضاوي وعمرو خالد
ومعروف انهم لايعترفون بالشيوخ الا اذا كانو ذو اجازات من شيوخ أكبر ولمده معينة ........أنا لا أقول انهم سيئون ولكنهم لهم مميزاتهم وعيوبهم ولا شئ كامل في كل شئ.....
والنظرة الى الإسلام كدقن وجلباب نظرة سطحية جدا لأنها مكملات و الشئ لا يكمل ولا يصبح كبيرا الا بتلك الأشياء الصغيرة
وعلى فكرة انا لا انتمي الى اي من تلك الجماعات سواء الأخوان او غيرها
وواضح ان انت استعجلت جامد عليا لأني كنت هكمل في البوست الجاي

albida said...

والله انا مش هفتى فى الموضوع ده لأنى فعلا من الناس اللى أنت اشرت اليهم.. اللى مش فاهمين حاجة فى أى حاجة, وكل مفاهيمى عن الجماعات فى مصر مهلبية
الاعتراف بالحق فضيلة

على العموم أنا لسه بكون فكرتى من خلال قرايتى


فى انتظار البوست القادم

manal

إنسان || Human said...

أروى شكرا لزيارتك وتعليقك وأتمنى تتكرر ملرات أخرى
......................
محمود السعيد
فعلا عندك حق احنا تعددية في كل حاجه ....الأراء على عينا وراسنا بس الأهم احترام الأخر
......................
koukawy
شكرا على تعليقكم واهتمامك
هما مش متشددين أوي يعني لكن عندهم اكيد مميزات .....فعلا الإخوان سياسة بصبغة أسلاميه اكثر
.................
الوردة السوداء
شكرا ياوردة ....واتمنى دوام التواصل والتعرف على افكالر بعض اكطترؤ واكتر

إنسان || Human said...

albida
حمد الله على السلامه.......فعلا الإعتراف بالحق فضيلة ..وانت شاء الله منتظر تعليقك على البوست القادم