Monday, July 14, 2008

نماذج

نموذج رقم واحد
تلافيف
هاهي تلافيف عقلي تسحبني إلى نفق مظلم ..نفق النفس المظلم
لاأدرك أجاءت الغجرية مرة أخرى بوجهه العابس المقزز ..لكنها جاءت نعم جاءت
لاتذهبين بالله عليكي ..فنفسي المظلمه تؤرقني ..تعبث بي وترميني بين الإختلاجات والزفرات
ستأتي ..لاتقلقي ..ستأتي وفي يدها اليمنى بلورتها السحرية واليد الأخرى ( مج نسكافيه )؟؟
تطالعني من تحت نظارتها المقعرة ...وأعود ..وأعود ..وأعود ..وأسبح في تلافيف عقلي المتورمه ..حتى أدركت أن الوصلة بين فصي المخ قد أنعدمت ..عادت إلى النفق المظلم ثانية ..وسحبتني معها كأضحية العيد الصغير (على فكرة مافيش أضحية في العيد الصغير )؟
posted by واحد
التعليقات
المر بزيادة يقول ....؟
هيييييه أول تعليق ...هاروح وأرجع تاني
المجروح في قلبه قوي قوي قوي يقول ...؟
كلمات رائعة ..تحفة ..ساحرة ..نابعة من العقل الباطن ( والظاهر أيضاً ) شكراً على زيارتك الميمونه
أسى الليل الأسود يقول ..؟
ماهذا...دائماً وكالعادة فنان ..ترسم بريشتك ..كلمات لامعه ..ماهذه التحفة الفنية النادرة تجعلني أذوب كقطعة السكر في كوب العصير
*#@*~ santos
nice post
i wish u good
ذهبت ولم تعود أبدا تقول ...؟
جميل جداً
دام قلمك لنا
المر بزياده يقول ...؟
ياااه أخيراً معلش أتأخرت ...إيه الفن ده ..مش مصدق أنا حصلي نوع من أنواع التوحد مع النص
توتا الصغنتوته. يقول ...؟
تلافيف عقلي تسحبني إلى النفق المظلم
وتأخذني كما لوكنت ذبابة مستأصلة الجناحين والقدمين واللسان ( هي الدبانه عندها لسان ).؟
..........................
طبعاً أنا مش فاهم أي حاجه من البوست ..هاعمل حاجه من الإتنين بعد ماعطلت نفسي وقريت الكلام ده ..أول حاجه ممكن أعملها أضغط باك وأطلع بره المدونه كلها ..وأنا حاسس إن حمار لأني مافهمتش البوست ..ساعتها بحس إن أنا مابفهمش وإن الناس اللي علقوا ..أنا أقل منهم في رجل ولاحاجه ..؟
الحاجه التانية اللي ممكن أعملها..أقول لا أنا مش أقل من الناس دي ..ولازم أقول أي حاجه ...أثبت وجودي من الأخر ..مش معقولة أقرا البوست تلات مرات وبرده مش فاهم وأطلع قفايا يأمر عيش ..؟ ساعتها بحاول أمسك في أي حاجه فاهمها في الكلام وأحول أعلق عليها
في حل تالت ..ممكن أعمله ..وده نادر جداً لما يكون الموضوع مستعصي ..ساعتها بكتب وأقول أنا مش فاهم حاجه
..........................
أسماء المدونين
أسماء الناس اللي بتدون بقت حكاية ..أصبحت أشبه بأسماء الأفلام مثلاً وده من عندي أكيد يعني ..( سهاد النهار -التائبة )
وهكذا ..أسماء عجيبة ..هناك أسماء أخرى باللغة الإنجليزية أو حتى لغات أخرى ..ودي حكاية ..محتاجه قاموس عشان تترجم ..ولاأدري أين المشكله هنا هل المشكلة في اللي إختار الإسم ده بالتحديد أم المدونين الآخريين اللي ثقافتهم الأجنبية متدنية .. فياريت الناس دي تراعي الغير ..فتكتب ترجمه للأسم جمبه ...مثلاً
sorrow يعني حزن
ونقلبها حصة إنجليزي ...؟
عندك نوع تاني من الأسماء بيكون عامل زي أسماء أفلام الكرتون ...؟
أما أسماء الدكاترة ...هاتلاقيها قبلها دكتور كذا ...وأسماء المدرسين مستر أو أستاذ كذا ...والمهندسين برده نفس النظام ...الصيدلة على فكرة كتير قوي مش عارف مش لاقيين شغل ولا إيه ... بعد كده إنشاء الله هانعمل نقابات للمدونين...نقابة المعلمين وهكذا ...
هناك أيضاً أسماء تدل على توجهات يعني سبحان الله أشوف بعض الأسماء أدرك توجهات أصحبها قبل ما أشوف مدوناتهم ..مثلاً الثائر ...المجاهد ....المؤمنه ...المغفور لها ..... المتوفي ..الله يرحمه
هناك أسماء حقيقية ودي بحترمها جداً...زي مثلاً محمد السيد ( اللي هو أنا )؟
.........................
الصور
ياسلام ودي حكاية تانية خالص ...تلاقي صور عجيبة ..ناس بتحط صور نجومهم المفضلة ..وهناك صور أطفال ..أما فصور البنات ..فاانا الصراحة ..بوجه كلمه للبنات ..يعني ياريت يخلوا بالهم شوية من الصور اللي بيحطوها ,,صور بتكون مكشوفه شوية ومعظمها بيكون مرسومة ..يعني يراعوا إن في شباب ..وكده ..يعني أي واحدة خالعه راسها ..كده يعني
.......................
نموذج رقم إتنين
(صورة غامضة )
متى سيأتي ؟؟؟
posted by واحد برده
التعليقات
المرحوم يقول ..؟
سيأتي قريبا ..سيأتي أعلم أنه سيأتي
شيكولاته وكنتالوب يقول..؟
من ؟ مين اللي سيأتي؟؟؟
سوسو السفروتو
أزيك عامل إيه ...والله وحشتني يابني ..ماتتصلش بعد الساعة واحدة عشان بابا بياخد التليفون ويحطوا تحت المخدة
@#!@~ santos
nice post
very good
u fine .... i'm fine too
حمض الطرطريك ( واضح إن هو شغال في معمل طبعاً )..يقول
سؤال يعبر عن إختلاجات النفس الترقبية ..سؤال أبدي لا يجاب عليه في يوم وليلة بل في ثلاثة أيام
dr /fa2fa2
تبرعوا لأخوانكم على حساب رقم5144985444
إن الأمر لجلل لذلك نحتاج لدعمكم لنا
فسفوسه يقول ...؟
هييييييييييييييييه......أنا جيت أنا جيت وسع وسع ياجدع
تحياتي ياباشا
المر بزايادة..يقول..؟
ياااه فاتني أول تعليق ياخسارة
بص لما يأتي قولي ..عشان أنا ورايا شوية مشاوير
...والنبي ماتنساش ..عشان نروح نستقبله وأجرله عربية بيجو سابعة راكب وأجيبه من المطار
...إلا صحيح أجر هالوا من أنهي موقف من عبود ولا العبور
سونسن الشجاع يقول...؟
سيأتي بإذن الله ..لكن لازم تخلي بالك ..وتحوش كويس عشان تولد في مستشفى إستسماري ..أه ربنا ينتعها بالسلامه
..................
طبعاً البوستات دي مشكله ...عبارة أو بضع كلمات والمدونين يعلقوا وهما مش فاهمين أي حاجه ..المدون يقصد إيه بالظبط وكل واحد يعلق على مزاجه واللي فهمه ..؟
في بوستات تانيه عجيبه ..دخلت مره مدونه لقيت بوست تقريباً شامل وكبير جداً ..حاطط فيه أولاً وثانياً إلخ إلخ ...وبيتكلم في مية حاجه وحاجه ...طيب يركز في حاجه ...لاء ...سياسه وإقتصاد ورياضه وموقف شخصي ...بيكون عبارة عن فرح أو مولد ..عامل زي مايكون نشرة أخبار...طيب اللي يعلق ..يعلق على كل ده و لايختار حاجه معينه ..؟
يعني هو يا نكتب كلمتين غامضين ...يا نكتب حوالي صفحة تخلي عين المدون تورم
------------------------
أي تشابه في أي حاجه مقصود تماماً ...ومش عايز حد يزعل
تحديث : تلك النماذج لم تُقتبس ..ولكن أنا اللي كتبتها
البوست ده جه عليا بخسارة ووقعني في شر أعمالي ..ولكن لاتراجع
hu-man
إنسان..بس أه والله ..مش حاجه تانية ..لكن الشَرطَه دي عشان التميز بس ..عشان الإسم ده أنتشر

39 comments:

Moustafa` said...

انت مشكله
---
نموذج واحد مع احترامي لدماغك
انا عاوز لنك الراجل ده
ده فنان بجد .. أسلوبه ومشاعره خرافه
---
نموذح اتنين
انا بحترم النوعيات دي
صوره وكومنت صغير عليها
---
التعليقات بقه اللى ضحكت عليها اوي
اظنها لشخصيات وهميه بس هيا واقع
---
تقبل تحيتى لدماغك وعدستك الواعيه
سلامي

كلام وخلاص said...

احلى نوع كتابه باحبة اللى بيصور من فوق وانا باعلق دلوقتى خايفة لاكتب كلمة شبه اللى قولت عنهم ربنا يستر على فكرة فيه جمل فى النموذج الاول شغالة يجى منها بجد
بوست جميل
سلام

abo salah said...

بعد السلام عليكم


هوا البوست مشكلة فعلا

وعلي فكرة
أنا اكتر حاجة ضحكتنى فى البوست دا التعليقات اللى أنت كاتبها
لا بجد مسخرة

أما بقى عن نوعيات الكتابة
فأنا مؤمن بأن الناس فيما يعشقون مذاهب

بس بجد بوست جديد من نوعه

تحياتى ليك

Doaa Ebrahim Aaql said...

ازيك ياجميل

بجد فكرتك حلووووة اووووى
انا لغاية دلوقتى
مش قادرة ابطل ضوحك

لدرجة انك خلتنى افكر
جذرياً اغير اسمى
واشقلبه عربي


بس رجعت قلت بلاش
ده اسمى اللى اتعرفت بيه
فى عالم التدوين
منذ اليوم الاول

عارف
لما حد بيختار اسم
بيختار حاجة بيحبها
موجودة فيه
او نفسه تكون موجودة فيه

ومع الوقت هتحس بارتياح للاسم
وهتعود عليه

..

والتعليقات جميييييله بجد

.
.

تحياتى ومودتى

RASHA said...

كلامك مظبوط خصوصا ساعات التعليقات مستفزة لما يكون البوست عادى والتعليقات مستفزة على اساس انه محصلش ومفيش بعد كده

kmt said...

السلام عليكم ورحمة الله وبركاته

كل اللي اقدر اقوله
انك معاك حق
في حاجة كمان
ساعات ادخل بوست واحس ان مستواه ضعيف جدا واقلائي اكثر في 50تعليق جميل ممتاز وحلو
حاجة تجيب احباط

بس بجد البوست ده تحفه يتحسبلك
علي فكرة انا لما كتبت kemet كتبت الترجمه جنبها قبل ماتقول

تحياتي
الي اللقاء

نعكشة said...

ههههههههههههه

والله مافهمت حاجة
و قولت انا فاتحة المدوننة ألاقي التعليقات ظهرت فجأة
وبعد التعليقا فية الصور
أنا قولت مخي ضرب
قريتها تاني ففهمت بقة

فأتكلم

انا عجباني تلافيف المخ جداً
برغم عدم قدرتي علي فهم الست الغجرية إلا انني قد اتخيلها أي شيء في صراعي النفسي الداخلي
بس عجبني البوست قوي
....

بتفقع جداً من حكاية هيييه اول تعليق
بجد حقيقي بتفقع و المشكلة مبيقولوش حاجة ههههههههههههههه غير هيه اول تعليق

مببقاش صراحة عارفة المفروض اقول إية لما حد بيمدح
انا مبحبش المديح اصلا
بس عشان الصدق

فيه ناس معينة
لما بيقولوا الموضوع حلو ببقى حاسة انه فعلاً حلو برغم اني مببقاش حاسة بكدة
المهم

بخصوص الاسماء

ماشاء الله ماشاء الله من ذا الذي يتحدث
hu-man
ماهو يا تترجم قصدك >>> hue man
ولا human
ولا ميكس

اني وايز انا شايفة ان الاسماء دية عادي يعني كل واحد يفتكس الاسم اللي يعجبة
و كلو قشطة

.........
الصور

صراحة و الحمد لله ولا اتمني
مشوفتش صور خليعة في الجوار

...................


النموزج التاني بتاع متى سيأتي

فكرتني بمرة كنت داخلة مدوننة واحدة و قريت بوست
فهمتة بطريقة معينة
انه حاجة حلوة
المهم دخلت اعلق
و انا فرحنالك وب تاع
المصيبة بقة
ان كل الناس دخلت بعدي تقولها طعنة
دة شيء بشع
دة شيء مريع
ازاي يحصل
وربنا يعينك
أنا قولت صراحة إني بلهاء بس انا شوفته كدة و علقت كدة
يعني هما الناس اللي علي صلة بالوضع ممكن يدوننوا
بس انا حشرية برضو ولازم ادلي بصوتي
هههههههههههههههههههههه

عامتشاً

تدوينة ساحرة باهرة شاحرة فاحرة
عبرت عن شلاكيح عقلي المتفلفل في سماء الافق

و معلش إني مش اول تعليق

هههههههه

دمت سالم

سلامٌ عليك

Unknown said...

اممم

عجبانى جدا

تعرف شدنى اية

التعليقات

حسيت ناحيتها بشعور غريب

هى نفس التعليقات اللى بتضايقنى

اللى تقولك جميل ورائع من غير ما تتناقش معاك

مش عارف لية بحس بنوع من العداوة بينى وبينها

مع انى برد عليها بنفس السلوب

وشكرا ومنور ويارب دايما تعجبك

بس انا مبحبش كدة احب

تدخل تناقشنى فى الفكرة
لو مختلف معايا اختلف

لو مش مختلف ضيفلى فكرة جديدة نصيحة جديدة

دى اهمية التدوين

اقولك على حاجة مع ان فى كذا نقطة بختلف معاك فيها

زى الاسماء مثلا والصور

بس التدوين محتاج كام بوست زى بتاعك دة عشان يتحسن

لانى اول مادخلت التدوين كان بالنسبة ليا زى المدينة الفاضلة

مكان انا حر فية

بس الفترة الاخيرة

بدات اشوف الهيافة والهبل اللى برة

فى التدوين


نموذج رقم واحد

بعتبرة نوع من الصراع النفسى الداخلى

اللى بيكتب جواة صراع مش عاوز يطلعة برة

حاجة كدة عاملة زى اعلانات الافلام

متبقاش عارف قصة الفيلم

بس بتحس من الاعلان

نوع الصراع اللى فى الفيلم دة اية


النوع التانى

بحبة جدا برضوا

بيستفزك انك تشغل تفكيرك

تتخيل الموقف بطريقتك انت

وتعلق على فكرتك انت

فى النهاية

عاوز اقول حاجة

المدون مش صحفى المدون بيكتب لنفسة

وبس

بس اكيد محتاج حد يشجعة

اتمنى ميكونش تعليقى تقيل

وبسئل مادام طلعت بلدياتى

عاوز اتواصل معاك

أمـ الله ـة said...

السلام عليكم ورحمة الله وبركاته
حكاية أسماء المدونين دي فكرتني باسماءالناس بتوع المنتديات نفس الحكايه تلاقي اسماء عجيبه أم الحزن والكأبه أم أربعه وربعين وهكذا والناس فيما يعشقون مذاهب المهم في موضوع الاسماء دا أنك تعرف تقرأ الاسم يعني عشان تعرف تنادي علي صحبه لو احتجته وله حاجه وبالنسبه للنفق المظلم ياريت تركب اضائه عشان الحوادث

Empress appy said...

هى دى الشخصيات الموجوده فى الحياه وحوالينا مش عارفه ليه بس تحليلات هايه بجد

emad.algendy said...

هههههههههههههههه
انا برده ما فهمتش اول كوب نسكافيه؟؟
مفهتمش بجد؟
عموما
بعد ما بعدت عن التدوين فترة بفكر ارجع ازاي وقد ايه هضيع وقت اني ادور على ناس بتكتب كويس استمتع بيها
"اتكلموا اتكلموا ماحالا الكلام ما اعظمه
"
بس انا بعمل حاجة ظريفة
لما بلاقي موضوع معجبنيش بقوله وحش وانا مالي وايه العامية المفرطة وكده

عموما
انا حابب يكون عندي عدد قليل من الزوار وعدد قليل من المدونات اللي
استمتع بيها
وبرده مش حابب المدونة تتقلب صالون ومجاملات اجتماعية وزيارات
مش عاجبك بوست قول
لما عملت مدونتي صحابي في الحياة كان عندهم مدونات ماقولتش لحد
كنت حابب اكون صادق اكتر
بس عرفوا طريقها برده
غالبا هعمل واحدة جديدة عند العودة

اعتذر للاطاله

عود احمد لمدونتك
ولا عود محمد؟؟؟
:)
انا قريت البوستات اللي فاتت وسبت تعليق
تحياتي

نعكشة said...

شوفت بقة عشان الانسان لما بيحاول يشغل عقلة

ياما دكتور الكوميونتي قالنا ( بغباء يا دكاترة ) مقصدش حاجة والله

بس اصل hue man اقرب لإنسانف ي عتمة نور
فقولت بقة انك عملت مزيج من hue man و human

عامتشاً

خلص عفونا عنك

دمت سالم

سلامٌ عليك

أثمن من اللآلئ said...

تفتكر بعد اللي انت كتبته ده هعلق اقول إيه

... مش بعيد الاقي تعليقي من ضمن الموجودين في البوست ده

بس تصدق ... انا من ضمن الناس اللي بتقرأه مدونات كتيييييييييير لكن مش بحب اعلق كتير

مش بعلق غير في المواضيع الجامده
يعني اللي بتناقش حاجات مهمه يعني يكون محتاجها ومفتقدها المجتمع

وبصراحة ... موضوعك استفذني قوي يس هو بصراحة واقعي جدا
فقررت ارد

تقبل تحياتي


اخوك
أثمــن من اللآلئ

nermeen said...

بجد ضحكتني اوي
خصوصا ستأتي و معها مج النسكافيه
واقعي اوي
بص هو يمكن ناس كتير بتعلق لمجرد انها تعلق
يمكن بيعتبروها نوع من التواصل
او علشان يبقوا موجودين
مش عارفة
بس عموما هو نقد جيد لحالة التدوين

و لطيفة مدونتك يا انسان

shaimaa samir said...

انساااااااااان

رائعطريقة طرحك بصدق
اتما عن النموذج الاول
فللصدق اعجبتنى الكلمات
لكن بقا التعليق بتاع التليفون ومتتصلشى بعد الساعة واحدة
ده ضحكنى وبكانى
عفانا وعفاكم الله

عامة موضوع قيم
هادف
بجد
جزيت الخير

Anonymous said...

شوف يا سيدي ..
أنت مهيس شويه بس دمك خفيف
أنا اللي جابني عندك تعليقك عند الدكتور ياسر ثابت
رجل محترم يفتح افاق لموضوعات نخجل من الحوار فيها علي الملأ ونتلذلذ بالحوار فيها سرا
ودي شيزوفرنيا العالم العربي ... عادي جدا
وتعليقك كان من نوع غريب أنت لم تتطرق ليه في شرحك للتعليقات

وكمان أيه اللي أنت كاتبه وانت بتعرف نفسك؟؟؟ أسمي محمد بس نسيو يقولو أنسان؟؟
الأنسان الحقيقي هو اللي بيفرض أنسانيته... وبيعرف نفسه بنفسه
ياما ناس شكلهم أنسان وقلبهم وعقولهم بقر وحجر

هاجرب أتابعك يمكن أعرف أصلح نظرتي فيك
:)
تحياتي

bastokka طهقانة said...

اول ما قرات النص كنت ناوية ادخل اقول اية اللي انت كاتبه ده انا مش فاهمة حاجة
هههههههه
بس في ناس بتحب تتفزلك و تعمل روحها فاهمة كل حاجة و تكتب تعلبقات كلها شكر و ثناء قال يعني فهموا اللي مكتوب
هههههه
اوروفوار

رؤية said...

لا ادرى بما اعلق...
لكن طبيعى ان تجد من لا يفهم(وانا على قمتهم) لكن اللى فهمتو هى حالة الفانتازيا التى كتبت فيها...وانا اعشق تلك الحالة...لذلك ساقول ان البوست عجبنى...هناك مقولة تقول ان المعنى فى بطن الشاعر ...هذا ما اظنه هنا وان كان الظاهر مجرد وصف لاوضاع ظاهرة ..كثيرة ..ومتناقضة،
اسفة على الاطالة،
وسعيدة بالتعرف على مدونتك.

LioRomio said...

كاميرا ممتازة ورصد جميل ...

مع اني أحيانا أومن بضرورة خلق نوع من التواصل بتعليقات وان كانت سخيفة أحيانا ...

مع انتشار عالم التدوين ودخول الكثيرين اليه فستجد التنوع الذي رأيت والذي رصدت في تدوينتك الرائعة

سلمت يداك سيدي

Gannah said...

البشر مختلفون وعقولهم ايضا مختلفه والتدوين هو جزء من العالم الخارجى بكل عجائبه وغرائبه وبالتالى من الطبيعى ان يكون الحال فى بعض الاحيان كما رصدته
تحياتى

فى القلب said...

عارف ليه كتبت البوست ده وحسيت بالأحاسيس ألى فيه دى
لأنك ببساطه أنسان و حساس كمان
واضح و صريح

خليك زى ماأنت كده حتى لوشفت نفسك غريب عن الوسط المحيط

أستمر فى أنسانيتك

dr.Roufy said...

هههههههههههههههههههههههههه
هو دا الكلام
عالم التدوين مثله كمثل اي شئ
يضم كافة الأطياف والعقليات
وأحيانا النكات..والسخافات
بس فعلا باسلوب ساخر ولاذع الواقعية قدرت انك تنقل صورة ..غنية ورائعة

تحياتي

RASHA said...

هيومان مرروا لى اصدقائى كراسة الواجب وبالتالى مررتها ليك ارجوك زور مدونتى عشان تعرف اكتر عن الواجب واتمى انك تحله شكرا

محاولة لكسر الصمت said...

لأ بجد فكرة البوست ده جامدة موووووووووووت.
فعلا الواحد بيلاقي حجات عجيبة وهو بيقرا على المدونات وبيحس انه من بين كل 15 مدونة ممكن يلاقي مدونة واحدة تستحق الاحترام

إنسان || Human said...

s@g
الله يخليك ياسيدي ...والنموذج رقم واحد من تأليفي ..عشان مانجرحش في حد وحد يزعل منا...؟
وأنا بحترم رأيك جداً
وتعليقك يهمني جداً
.........
كلام وخلاص
لاياستي ماتخفيش البوست ده وتعليقاته مفتوح نعمل فيه اللي احنا عايزينه
.........
أبو صلاح
الله يخليك ياسيدي ...هو فعلاً جديد من نوعه ...ولولا إختلاف الأراء لبارت السلع ده شئ أساسي في الدنيا وبما إن التدوين جزء لايتجزء من الحياة فده شئ طبيعي جداً
.........
برنسيس دودو
كويس إن انا ضحكتك بالشكل ده
أنا مبسوط فعلاًُ...أنا فكرت أغير إسمي كتيييير بس نعمل ايه أتعرفت بيهم ومجرد تغييره كأنك بتبدأ من الأول ...على العموم أنا مبسوط قوي من رد الفعل ده
............
شاشا
هي بتكون نوع من أنواع المجاملة أو النفاق وده غلط دايماً بقول إن زي ماانت بتضحك على الناس هاتلاقي الناس بتضحك عليك ...سلف ودين زي مابيقولوا
شكراً على التعليق والواجب وهاحلوا في أقرب فرصة بإذن الله
............
وعليكم السلام ورحمة الله وبركاته يا كيمت
ولا تجيب احباط ولا حاجه ..إحنا مالنا بيضحكوا على نفسهم هما اللي هايخسروا ...وكويس ان انت ترجمتي المعنى مش زي ناس تانية أساميهم غامضة ومش معروفة الا ليهم وبس

إنسان || Human said...

نعكشة
هههههههههههههههههه
ده انتي كاتبة بوست لوحدك عامتشاً ...أنا مبسوط فعلاً من التعليق اللي بإستفاضة ده ...ومش عارف أقولك إيه ولا إيه ...المديح أنا مش هاضحك عليكي وأقولك باكرهه لكن لما يكون في محله كويس لكن مش على حاجه وأنا حاسس ان انا ماعملتش أي خاجه ده بقة بيخنقني بجد ...وأنا متفق معاكي فعلاً إن فيه ناس معينين لما بيعلقوا بتحترميهم قوي وبتكوني مستنيه تعليقهم على نار ويهمك رأيهم فعلاً ...زي أنا كده مابستنا تعليقاتكم ويهمنى فعلاً رأيكم حتى لو ضدي

إنسان || Human said...

واحد مش فاهم حاجه
إزيك يابلدياتي ...ولا تقلت ولا حاجه ..أنا متفق معاك في كلامك عن التدوين والتعليقات ان هو المفروض يكون إضافه لكلا الطرفين حتى لو كانوا مختلفين لكن المشكله ان في ناس بتستسهل الموضوع وتعلق اي كلام وخلاص
...وللأسف كأن التدوين أتعدى من المجتمع اللي بره وأتنقلوا الهيافة والنفاق والمجاملات التافهه ...أشكرك على تعيقك ويهمني دايماً رأيك
...........
أمة الله
وعليكم السلام ورحمة الله وبركاته
أهلا بيكي لأول مره عندي في المدونه
فعلاً الأسماء عامله زي أسماء المنتديات وفيه ناس كتير جداً من مستخدمي المنتديات أنتقلوا للتدوين ...وأما عن الإضاءة فتقريباً الكهربا لسه مارحتش عندهم من أساسه
..........
آبي
هي فعلاً عبارة عن إنعكاس للمجتمع بس اللفرق ان احنا اللي بنختار
أشكرك على تعليقك
........
نور
قد إيه مش قادر أوصفلك سعادتي بجد بتعليقاتك دي ...وجميل إن ان انت تكون مقتنع بحاجه وبتطبقها بالشكل ده
عدد قليل من المدونات أستمتع بيها ...أحسن من انك تلوث عنيك بكلام مايستهلش يتقرى
أتمنى يانور العوده سريعاً ..سواءاً في ثوب جديد أو قديم

...........
أثمن من اللآلئ
أشكرك على تعليقك لأول مرة وأتمنى مايكنش الأخير
والله كويس ان موضوعي أستفزك عشان تعلق عليه ...وأتمنى تكون موضوعاتي دايماً تعجبك وأسمع رأيك فيها حتى لو كان ضدي
........
نيرمين
شكراً يانرمين ...ممكن يكون هو ده رأيهم عايزين يكونوا موجودين على طول هما برده ممكن يتواجدوا برأيهم بدون مايستسهلوا ويكتبوا كلمتين إشادة بدون مبرر وهكذا
الموضوع كده بقى سلق بيض
........
شيماء سمير
كويس ان هو ضحكك ..أكون نجحت في الهدف من البوست .,,وهو الواقع بتاعنا كده بالفعل مضحك ومبكي في نفس الوقت ...نعمل ايه بقه نكتأب
عفانا الله جميعاً
.........

إنسان || Human said...

بسمه
شكراً على مرورك ...وتلك المواضيع لاأخجل أبدا من التحدث فيها طالما لاأستخدم ألفاظ غير محترمه وأتحدث بأدب ...أما عن تعريفي بنفسي فأنا أعتقد أن الكثير تناسوا أنني إنسان لي كيان وأحلام وحقوق ..وأهدروا كل حقوقي هذا ماأقصد ودائماً رأيي سيكون غريب بالنسبة لك لأنك ضده
,,,,,,,,,,,
طهقانه
فعلاً الناس اللي بيحبوا يتفذلكوا وبيكون تعليقهم مجرد إثبات وجود لاأكثر وحولوا التدوين إلى مصلحة حكومية ..فيها دفتر إثبات حضور فقط
أشكرك ياطهقانه على تعليقك وأتمنى يتكرر على طول
..........
رؤية
زيارتك الأولى وإنتي ماطولتيش ولاحاجه ...لكن موضوع بطن الشاعر ده بيكون موجود أحيانا وأحياناً أخرى بيكون الموضوع غامض لدرجه ماتفهمش معاها حاجه خالص
.........
ليوروميو
أشكرك على الزيارة
هو فعلاً التواصل ضروري ولكن ليس بإستخفاف

إنسان || Human said...

جنه
فعلاً التدوين جزء لايتجزء من الواقع الذي نعيشه ..وعمرنا ماهنقدر ننفصل عنه أبداً
.........
في القلب
الله يخليكي ياأوشا...سرني تعليقك جداً ..أتمنى أثبت وأقف زي منا كده ..عشان أكيد مش هاعجب ناس كتير قوي
.........
دكتور روفي
شكراً ياستي...أنا ماعملتش حاجه غير كوبي وبيست وبس
لا أكتر ولاأقل
,,,,,,,,,
إسراء دواير
فينك من زمان ..المهم حمدالله على السلامه وفعلاً الواحد مابيصدق يلاقي مدونه كويسه يمسك فيها بإيده وسنانه..بس المشكله ان في ناس بتبخل بنفسها ..نعمل ايه بقه

RASHA said...

اعذرنى مش فاهمة مين بيضحك على مين وايه نفاق وليه كله سلف ودين وايه علاقة الواجب بده كله

إنسان || Human said...

شاشا
أظن إن الكلام مفهوم يعني ...أنا أقصدن دلوقتي لما أكتب بوست عادي جداً وبعدين واحد يجي يعلق عليه بيوصف البوست بصفات أحياناً بتكون مش موجوده فيه ومابيذكرش أي عيوب في البوست خالص ..ومستحيل نلاقي بوست وكلام بدون أي عيوب لازم يكون في عيوب ...وبكده الموضوع أصبح مجرد مجاملات ونفاق ..لأني بخبي عيوب البوست عن اللي كاتبه ..بس
فبتالي المعلق لما يجي ويكتب هو كمان بوست ..تتردله المجامله فالموضوع كله عمال يضحك على بعضه ..وماحدش بيستفاد من حاجه
أما عن الواجب فأنا بشكرك عليه وإنشاء الله هايتجاوب عليه بإذن الله قريب
أي خدمة تانية..شكراً

أسما عواد said...

محمد
اريد ان اشكرك على البوست وعلى تعليقك على مدونتي معا
ما تتحدث عنه واقع يصيب الحزن
المسألة مسألة امانة
على كل من يكتب كلمة ان يكتبها بأمانة انه مصدق بها وبأهميتها وليس حشو او تضييع وقت
بالمناسبة الرفاعي ليست مهنة ولكنها طريقة صوفية ينتسب اليها البعض
شكرا وتحياتي

shaimaa samir said...

السلام عليكم ورحمة الله وبركاته

يشرفنى دعوتكم لحضور حفل توقيع ديوانى الاول
اطياف الصمت

وذلك فى الثانى من شهر اغسطس
يوم السبت القادم باذن الله
الساعة 7
بمكتبة طلعت حرب


يشرفنى حضوركم جدااااا



انسان.. يسعدنى وجودكفى الحفل

دعواتكم

Unknown said...

بوست فكرته وهمية و صدقني مش بجامل
قليل بجد لما الواحد بيتكعبل في بوستات تجلي الروح زي البوست ده رغم ظلمته خارج منه نور مش فاهمة آزاي

Anonymous said...

thx u

GoodBlog

abo salah said...

بعد السلام عليكم

ايه الغيبة دى كلها ؟

لعل يكون المانع خير

منتظرين جديدك

تحياتى

Gannah said...

كل عام وانت بخير يا اخى
أين أنت؟؟؟
تحياتى

Ganna Adel said...

سلام عليكم
مدونتك مختلفه..جدا كمان..
قريت معظم اللى كتبته وكله ما شاء الله بيدل على وعى و ثقافه..
نيجى للبوست ده باه:
حضرتك شاهر سيفك على المدونات و المدونين و بتنتقد طريقتهم فى التعبير عن نفسهم سواء بالصور أو الاسماء و مش واخد بالك ان مدونتك دى مساحتك الخاصة اللى بتتواجد فيها زى ما انت عايز تتواجد..بالاسم و الشكل اللى انت اخترته..
اعتبره نوع من تقبل الاخر زى ما هو اختار انه يكون..مهما كان اختياره مختلف مع زوقك ..
و التدوينات اللى ممكن تبانلك سخيفه و مالهاش معنى هى اكيد بتعبر عن حاجه مرت فى ذهن اللى كتبها و شاف فيها الاهميه الكافيه لأنه يعبر عنها..و المغزى منها ممكن يكون وصل لناس معينه و عشان كده بيسيبو تعليق يبدو ليك مبالغ فيه لكن كل الحكايه انهم فهموا اللى كاتب ده كان كاتبه ليه أو كان حاسس ايه وهو بيكتبه..و الموضوع لمسهم من قريب او من بعيد و أبدو اعجابهم بيه..
بس يا سيدى :)
سعيده بمدونتك اوى و دمت بكل ود
سلام

إنسان || Human said...

أسما عواد
شيماء سمير
عاليا حليم
أبو صلاح
جنه
أعتذر منكم جميعاً على تأخر الرد على التعليقات , وأشكركم كثيراً على إثرائكم وتشريفكم لي
أما بخصوص
فتاة في المرآة
أنا لا أشهر سيفاً ولاشئ ,ولا أقصد الهجوم أبداً على أحداً , أولاً أحببت أن أخلق نوعاً من النقد للمدونات ولكل شئ نقد , وده طبيعي جداً , وأنا حبيت أعملها بشكل ساخر , وفعلاً أنا مُصر إن بعض التعليقات أخذت شكل من أشكال النفاق الإجتماعي والإطراء المفرط , لم يعد هناك نقاش كما في السابق
زي ماانت عملتي كده ..إنتي دلوقتي علقتي تعليق محترم , خلتيني أنظر للموضوع من زاوية أخرى حتى لو أن معاكي أو مش لكن النقد البناء يفيد دائماً
فأنتي لم تكتفي بالإطراء البسيط , لكن أعترضتي وده من حقنا كلنا.......؟
وأنا لا أقصد أبداً أن أسخف من الآخرين