Thursday, November 04, 2010

ثلاث رسائل

من صديقك / أحمد
السلام وعليكم ورحمة الله 
أتمنى أن تكون بأفضل حال , صديقي لا تحزن ولاتعجز  , لا تنسى أن الله معك دوماً ونحن ورائك بدعواتنا , لا أعلم بالفعل كيف أقولها لك ولكني أفتقدك جداً , أفتقد لبسمتك , لضحكتك التي دوماً كانت تغمرني سعادة , أفتقد حزنك , أفتقد جنونك , أتتذكر جلساتنا سوياً , جدالنا الدائم حول بعض الأمور, سهراتنا حتى الصباح , التمشية بعد الفجر, طقوس رمضان الخاصة , بعد يومين عندي أول إمتحان من إمتحانات الدبلومة , لا تنسى الدعاء لي , أنا أعلم أنك تتساءل الأن عن أحوال (منار) كويسة الحمدلله , تدعو لك كثيراً أن يفك الله كربك ويعيدك سالماً , أسكت مش أتخنقنا إمبارح تاني , ولكن أنت تعلم "بموت فيها " ,عادي سبب تافه ,( الخلطات بتاعة الحمام) مش عايزني أشتريهم دلوقتي , وانت عارف انا دماغي ناشفة إزاي , من يومين كنت مع أخيك , أخوك مش زيك  خالص على فكرة , بس كويس يملك هدف يسعى  لتحقيقه , عموما لا أريد أن أطيل عليك , تذكر ياصديقي دوماً أن من يؤمنون دوماً بأفكارهم ويسعون لتحقيقها , هم من يعانون كثيراً في هذا الوطن 
صديقك المخلص/ أحمد
......................................................................................................................................
من أمك حبيبتك
السلام عليك ورحمته وبركاته ومغفرته ,أسأل الله أن يلهمك صبراً وإيماناً , إبني وفلذة كبدي كم أشتقت إليك , أتلمس صورتك بين ثنايا عقلي أستحضرك في غرفتك وكتبك ورفاقك ,كم هم طيبون رفاقك , دوماً مايسئلون عنك وعنا , إبني حبيبي نحن ننتظرك بفارغ الصبر, فلا تهمل في نفسك " كُل كويس"  أنا عارفه طبعاً إن أنت بطنك صغيرة , لا ياحبيبي لازم تاكل كويس , عايزه أشوفك حينما يفك كربك " تخين" عشان نجوزك , نفسي أشوف ولادك ,أكيد هايطلعو زيك , بالمناسبة هاجر كل يوم تقريباً عندي , ربنا يخليكوا لبعض , واطلع بقه ولا انت خلاص عاجبتك حكايه كتب الكتاب دي ومش هاتعمل الفرح ,  ربنا بيمتحنك وانشاء الله هاتنجح في إختباره , بابا بيسلم عليك وأخوك مجنني , نفسي ربنا يعقله كده ويرسى ,مستنينك , وحشتني قعدة الصفرة معاك , أنا الحمدلله  كويسه وكلنا كويسين , الشغل دائماً  " زي ما انت عارف متعب" مشاكل على طول , المرضى دائمي الشكوى , من الصعب إرضائهم و ولكني أجتهد لأرضي ربي وأبذل كل جهدي,شد حيلك , كلنا في شوق إليك
ماما / ضحى
........................................................................................................................................
حبيبتك وخطيبتك /هــاجر
السلام عيكم ورحمة الله وبركاته , إنت عارف كويس قوي إن انت وحشتني ومتأكده إن أنا وحشاك , بس عايزه أسئلك سؤال هو فيه حد يكون خطيبته وحشاه  ومايردش عليها ,أنا زعلانه منك على فكرة , وعارفه أن انا أول ما هاسمع صوتك هسامحك , انت عارف أنا ازاي عبيطه معاك وانت بتستغل عبطي ده كتير , على العموم أشتقتك إليك , بحاول أقلها أهو بالفصحى زي ما انت بتحبها ..مش انت بتحب الفصحى , أشتقتك إليك ..لا أعلم لماذا لا تحتوي كل ما أعنيه ..حتى لو قلتها بالفصحى لن تستطيع الفصحى ولا العاميه أن تعبر عن ما أشعر به  ...مستنينك كلنا بابا وماما وعُلا وأحمد , كلهم بيسلموا عليك , كنت عندك النهاردة في الجورنال وكنت قاعدة على مكتبك مع سميرة زميلتك , أصبحت خطيبة المناضل , كل زمايلك في الجورنال بيسلموا عليك , زمانك بتسألني كالعادة عن أخبار الكلية أنت  عارف أنا مايتخافش عليا أنت سايب وراك عبد الجبار في الكليه مش هاجر,كالعادة الدكاترة خنقونا , والسكاشن وموعيدها والامتحانات المفاجئة الفارما مطلعه عيني إدعيلي بجد عشان أنا شكلي هاسيب الكليه دي بسببها, أه قبل ما أنسى هند وميار وكل صحباتي بيسلموا عليك
نصك التاني /هاجر   

11 comments:

أنا - الريس said...

مشاء الله يا عمنا
ازيك يا إنسان
منورنا والله
فكرة البوست جامدة
كتابة 3 رسايل سواء وصلوك
ربنا يخلي ليك صاحبك واسرتك وخطيبيتك
ويرزقك بالزرية الصالحة قادر يا كريم .

رحاب صالح said...

مساء الورود
ميرسي لزيارتك مدونتي
وبجد مدونتك كتير حلوة والبوست كتير اووي حساس ...وفكرته حلوة اووي بجد
احييك عليها برغم ان في كلام مش فهمته خالص مش عارفة ده خطأ املائي والا انا اللي مش فاهمة الكلام

Unknown said...

حبيت أقول
حمدلله على السلامة
لك مدة غايب عن بلوجر

Unknown said...

أما التعليق
فغداً بأذن الله

إنسان || Human said...

Mr.President
الله يعزك ياسيدي
بس هي مش ..مش ثلاث رسائل وصلتلي أنا بالتحديد ..هيا عبارة عن قصة شخص ما في السجن لسبب ما وصاحبه وامه وخطيبته بيبعتوا رسائل , وانا قصدت كده كتجديد , بدل ما أقول القصة بشكل مباشر , القارئ يستنتجها من 3 رسائل من أهله تلقائية جدا
.........
مساء الخير يا رحاب
الله يخليك يارب وميرسي على المجاملة
انا قريت البوست تاني وحاولت ادور على اي أخطائ تعيق الفهم , أعتقد الخط صغير شوية فبعض الحروف ممكن تكون متداخله , التاء ممكن تقريها نون مثلاً
على العموم هي افكار الخطبات الثلاثة غير مرتبه أبدا وده قصدته عشان الثلاث رسائل تلقائية و المفروض اللي كتبوها مش متمرسين للدرجة في الكتابة

إنسان || Human said...

Norahaty
بجد أنا في غاية الشكر لكك عشان انت لسه فاكره المدونه , ومتشكر قوي على السؤال , والمدونة تحت أمرك في اي وقت و مفتوحة لإضافتك لها في أي وقت

محاولة لكسر الصمت said...

أعجبتني الفكرة كثيرا


سعيدة جدا أن أقرأ لك مرة أخرى,. مرحبا بعودتك

Anonymous said...

شكرا على البوست

Unknown said...

كل عام وأنت بخير أخى الكريم
وعيد أضحى مبارك إن شاء الله

Anonymous said...

مرحبا هناك ، وجدت الخاص بك بلوق عبر جوجل في حين تبحث عن الاسعافات الاولية لنوبة قلبية ومشاركتك تبدو مثيرة جدا للاهتمام بالنسبة لي.

إنسان || Human said...

شكررراً كثيرا لكل المعلقين
محاولة لكسر الصمت
أن سعيد أكثر لرؤية تعليقك

...........
أ/الجرايحي
يوميات شكراً
شكراً إهتمامكم كثيراً